Уредникот на ТВ Сител, Марјан Николовски е годинешниот добитник на највисоката државна награда за новинарство, „Мито Хаџи Василев – Јасмин“ – објави денеска Министерството за култура. Покрај Николовски, награда за достигнувања во новинарството добива и Аделина Марку. Награда за публицистика им се доделува и на Тошо Филиповски и Томислав Кежаровски
Министерството за култура денеска информираше дека на Филиповски и Кежаровски им се доделува наградата за остварувања во областа на публицистиката, а на Марку и Николовски за остварувања во областа на новинарството.
Одлуката е донесена на 29 ноември на седница на Одборот за доделување на наградата, а на наградените ќе им биде врачена на 21 декември во 12 часот во свечената сала на Собранието на Република Македонија.
Николовски е долгогодишен новинар и уредник во најгледаната македонска телевизија. Важи за одличен познавач на политичките состојби особено на односите меѓу Македонија и Бугарија и еден од најдобрите познавачи на верските прашања меѓу македонските новинари.
