Студенти од Охрид освоија Гран при и 9 медали на меѓународен натпревар по гастрономија во Истанбул

Медалите се освоени во категоријата специјалитети од пилешко месо, паста, а со наградата Гран при станаа неприкосновени и апсолутни победници во категоријата мистериозна кутија. На фестивалот учествуваа повеќе од 3.500 натпреварувачи од целиот свет

Со куп награди од Истанбул се враќаат студентите од Факултетот за туризам и угостителство во Охрид, насока Гастрономија, кои учествуваа на Меѓународниот натпревар по гастрономија во Турција. Во конкуренција од 700 учесници, тие успеаја да освојат Гран при и девет медали, од кои 5 златни, еден сребрен и три бронзени. Наградениот тим го сочинуваат студентите Христијан Јорданоски, Роберт Тодорчев и Стефан Аврамоски.

Tројцата студенти од ФТУ-Охрид ја освоија највисоката награда во категоријата „мистериозна кутија“ (Black Box), имајќи само 30 минути време да подготват врвен специјалитет со непознати намирници. Организаторот на фестивалот, Светската организација на готвачи, ги одликува македонските натпреварувачи со златни медали и им ја врачи Гран при наградата „Златно тавче“, соопштија од Факултетот на последниот натпреварувачки ден, 25 декември.

 

Селектор на екипата е доц. д-р Климент Наумов, кој од неодамна е назначен за раководител на студиската насока Гастрономија при Факултетот за туризам и угостителство од Охрид. Во изминатиот период тимот трудољубиво работеше и вежбаше во факултетскиот кабинет по готварство под менторство на професорот Наумов, а во координација со м-р Момчило Цониќ од Лесковац, Србија, експерт од областа на готварството и докторанд на Охридскиот факултет.

– Овие достигнувања на нашите студенти претставуваат огромен успех во промоцијата на македонската гастрономија во светски рамки – рече доц. д-р Климент Наумов.

Ректорот на Битолскиот универзитет, Сашо Коруновски, изјави дека е големо задоволството што се враќаат достојно и како шампиони од ваков престижен натпревар.

Mеѓународниот гастрономски фестивал Истанбул, кој по 18. пат го организира Федерацијата на готвачи и шефови на кујни на Турција (COCFED), се одржа во Евроазискиот саемски центар (Avrasya Fuar Merkezi) заедно со Светската асоцијација на здруженија на готвачи (WACS). На овогодишниот фестивал учествуваа повеќе од 3.500 натпреварувачи од целиот свет.

Фото: веб-страница УКЛО

 

ОСТАВИ КОМЕНТАР

Please enter your comment!
Please enter your name here