На 4 февруари, како што веќе најави бугарскиот премиер Кирил Петков, Македонија и Бугарија заеднички ќе го чествуваат Гоце Делчев по повод 150-годишнината од неговото раѓање, потврдуваат од македонската Влада.
Во чествувањето не е предвидено да учествуваат премиерите Петков и Димитар Ковачевски, туку тоа ќе го сторат членови на двете влади.
„Во тек е координирање на активностите преку Министерствата за надворешни работи на Северна Македонија и Бугарија. Она што е извесно е дека делегации од двете влади ќе положат цвеќе на спомен обележјата на Гоце Делчев во Скопје. Не е предвидено тоа до го сторат премиерите, туку други членови на двете влади“, ни одговорија од владината прес-служба.
Информацијата за заедничкото чествување ја објави бугарскиот премиер Петков во неговото реферирање за разговорите со Македонија пред Народното собрание.
