Христијан Мицкоски, претседателот на ВМРО-ДПМНЕ, вели дека пред трио недели на средбата со рускиот амбасадор Сергеј Баздникин му рекол дека го поддржува интегритетот и суверенитетот на Украина.
– Ме прашуваат за став за руската агресија врз Украина, а партиските глодари на СДСМ и ДУИ дополнително ќе речат сум немал став додека ја чекаат коската која треба да ја добијат од стопанот со крадени народни пари. Јас мојот став го кажав јасно и во лице пред дваесет дена на состанок со амбасадорот на Руската федерација во Македонија: “територијалниот интегритет на Украина како и на секоја суверена земја е константа и мора да се почитува, а сите различни ставови во поглед на актуелните прашања да се решат по дипломатски пат”, напиша лидерот на најголемата опозициска партија на Фејсбук
Тој додаде дека она што може Македонија единствено да направи во оваа ситуација е да обезбеди што е можно помали последици по сопствената економија.
Жалам што не можам да сторам повеќе, а се би дал да можам да спречам страдање на цивилите и невини човечки жртви. Но она што исто е важно за мене како човек и Македонец, како Македонија ќе се справи со актуелните предизвици на економски и енергетски план, какви се резервите со кои Македонија располага во услови на криза која надоаѓа, ќе продолжи ли криминалот и корупцијата како и распродавањето на националните интереси…
Работата на политичарите е да воспостават мир, да градат пријателства и да се даде шанса на дипломатијата.
Да се сочува меѓународното право и принципи, да се сопре агресијата и да се почитува територијалниот интегритет на секоја независна и суверена држава, додава Мицкоски.
Извор: Фактор
