Украинскиот претседател Володимир Зеленски ги повика луѓето ширум светот да се приклучат во борбата против Русија.
Во изјавата во неделата, тој ја обвини руската армија за убиства на цивили и ги пофали Украинците што имаат храброст да се бранат.„Украинците покажаа храброст да ја одбранат својата татковина и да ја спасат Европа и нејзините вредности од руски напад. Ова не е само руска инвазија на Украина. Ова е почеток на војна против Европа, против европските структури, против демократијата, против основните човекови права, против глобалниот поредок на правото, правилата и мирниот соживот“, рече Зеленски.
Обраќајќи им се на „сите граѓани на светот, пријателите на Украина, мирот и демократијата“, Зеленски рече: „Секој што сака да се приклучи во одбраната на Украина, Европа и светот може да дојде и да се бори рамо до рамо со Украинците против руските воени злосторници.
Во соопштението се додава дека оние кои сакаат да се приклучат треба да го контактираат одбранбеното аташе на Амбасадата на Украина во нивните земји.
Украинскиот министер за надворешни работи Дмитро Кулеба исто така го повтори повикот, твитувајќи во неделата:
„Странците кои се подготвени да ја бранат Украина и светскиот поредок како дел од Меѓународната легија за територијална одбрана на Украина, ве поканувам да контактирате со странските дипломатски претставништва на Украина во вашите соодветни земји. Заедно го победивме Хитлер, а ќе го победиме и Путин“.
Tv21
