Прекинат преносот на гас преку „Јамал-Европа“ од Русија до Германија

Пумпањето на гас преку гасоводот Јамал-Европа од Русија до Германија е прекинато од денеска во 9 часот по московско време, покажуваат податоците на германскиот оператор Гаскад (Gascade) и на аукциската платформа ГСА Платформ (GSA Platform).

Гаспром вчера го закупи капацитетот на Јамал-Европа од околу 750.000 кубни метри на час, што претставува речиси 20 проценти од неговата вкупна достава. Капацитетот руската компанија може да го користи од 08:00 часот по московско време на 4 март до 8:00 часот по московско време на 5 март.

Обемот на пумпање денеска од 8:00 до 9:00 часот по московско време бил 9.800 кубни метри на час, а од 9:00 часот по московско време преносот е целосно прекинат.

Гасоводот Јамал-Европа е долг 2.000 километри и може да носи до 33 милијарди кубни метри гас годишно, а поминува низ Русија, Белорусија, Полска и Германија. Овој гасовод, заедно со Северен тек и украинскиот систем за пренос на гас, е една од главните маршрути за извоз на руски гас во Европа.

Германија претходно соопшти дека почнала да купува гас заобиколувајќи ја Русија.

ОСТАВИ КОМЕНТАР

Please enter your comment!
Please enter your name here