Папата Франциск во средата го осуди „масакрот во Буча“ и го подигна украинското знаме испратено до него од градот, каде беа пронајдени масовни гробници и други знаци на егзекуција.
„Неодамнешните вести од војната во Украина, наместо да донесат олеснување и надеж, донесоа нови злосторства, како што е масакрот во Буча“, рече тој на крајот од својата неделна аудиенција.
„Суровоста станува се пострашна, дури и кон цивилите, беспомошните жени и деца“, рече тој.
Кремљ во вторникот рече дека западните обвинувања дека руските сили извршиле воени злосторства со убивање цивили во Буча се „монструозен фалсификат“ со цел да се оцрни руската војска.
„Вчера токму од Буча ми го донесоа ова знаме“, рече тој, развиорувајќи го и подигнувајќи го пред неколку илјади верници, што предизвика аплауз.
Знамето беше затемнето и извалкано и имаше натпис на него.
„Тоа доаѓа од војната, од тој маченички град Буча“, рече тој пред да побара од групата деца на воени бегалци кои пристигнаа од Украина во вторникот да му пријдат.
„Овие деца мораа да побегнат за да стигнат во безбедна земја. Ова е плод на војната. Да не ги заборавиме и да не заборавиме на украинскиот народ“, рече тој пред на секое дете да му подари по едно чоколадно велигденско јајце.
