Постои законска можност, според Кривичниот законик, секој што негира, грубо минимизра, одобрува или оправдува геноцид, злосторства против човештвото или воени злосторства се казнува со затвор од една до пет години, изјави министерот за внатрешни работи, Оливер Спасовски синоќешното гостување во емисијата Клик плус на ТВ 21.
Спасовски додаде дека доколку делото поттикнува омраза, дискриминација или насилство против одредена група, тогаш за сторителот е предвидена и казна затвор од најмалку четири години.
Соопштението на МВР и Јавното обвинителство беше за конфликтот во Украина, но не мора да значи дека е само за овој конфликт, законот е за сите. Мора да се крева јавната свест и воените злосторства не може да бидат оправдувани, рече Спасовски.
Тој истакна дека тука не станува збор за цензура, бидејќи нема забрана за пишување, но ги повика граѓаните да внимаваат и да реагираат против ваквите негирања на воени злосторства против цивили и говор на омраза, бидејќи тоа може да предизвика посериозни последици во општеството.
