Шалтерите за поднесување барање за издавање на изводи од матичната книга на родени, венчани, умрени нема да работат додека не им се покачат платите.
Од денеска вработените во оваа Управа штрајкуваат, додека граѓаните негодуваат.
Од Независниот синдикат за водење на матични книги велат дека се решиле за штрајк оти никој не го вреднува нивниот труд, а последниот извештај на Државниот завод за ревизија утврди многу неправилности во работењето на Управата за водење матични книги. Освен финансиски неправилности, Државниот завод за ревизија утврди и дека само во 2019 година Управата издала погрешни 21.957 изводи.
Граѓаните реагираат дека поради работата или како што велат неработата на вработените во оваа управа се соочуваат со губење на време. Се чека, се добиваат погрешни документи, мора да се оди по неколку пати, а сето тоа може да се заврши електронски – сметаат граѓаните.
Еве ги нивните реакции:
-Вработените во матично треба да плакаат за да работат, а не да земаат плата, секој втор документ што го издаваат е грешен и со закаснување, не знаат да прочитаат тоа што си напишале.
– Пред да излезете да штрајкувате, проценете ја ефикасноста и ревидирајте ја превработеноста на институцијата. За еден документ човек оди по 5 пати.
