На 3 мај 1942 кај селото Лавци, Битолско, е убиена Мара Јосифоска – Ѓурѓа, припадник на македонското националноослободително и комунистичко движење и учесник во антифашистичката војна во Вардарскиот дел на Македонија.
Родена била во Прилеп во 1920 г. Под влијание на своите браќа Кузман Јосифоски-Питу и Аспарух Јосифоски, во прогресивното движење била од пред Врората светска војна. Работела како организатор на активот на напредните жени во Прилеп и учествувала во Илинденските демонстрации во 1940 г. Била во составот на Првиот прилепски партизански одред „Гоце Делчев“ и учествувала во сите негови акции против окупаторот и неговите домашни соработници. По расформирањето на одредот „Гоце Делчев“ дејствувала илегално во селото Лавци, Битолско, а по формирањето на првиот Битолски партизански одред „Пелистер“ била борец во истиот. Загинала во борба против окупаторската бугарска војска и полиција.
