Најавениот штрајк беше во организација на Независниот синдикат на возачите, кои се жалеа на лошите услови за работа и малите плати што ги добиваат за сработеното.
Секој вработен во ЈСП „Скопје“ независно од работната позиција ќе добие покачување од 2.800 денари. Токму поради ваквата одлука на менаџментот на сообраќајното претпријатие, се откажува и најавениот протест на возачите на ЈСП, кој беше најавен за оваа недела, односно за деновите 15 и 16 јуни, а требаше да се одржи во периодот од 11 до 12 часот пред дирекцијата на ЈСП „Скопје“. Најавениот протест беше во организација на Независниот синдикат на возачите, кои се жалеа на лошите услови за работа и малите плати што ги добиваат за сработеното.
Преговорите меѓу трите синдикати и менаџерскиот тим на ЈСП „Скопје“ околу линеарното зголемување на платата за 1.806 денари или за нови 177 бода за сите вработени со измена на Колективниот договор успешно се завршени. Со јунската плата, во јули почнува исплатата. Затоа ве известуваме дека протестот закажан за среда и за четврток се откажува поради постигнатиот договор – стои во официјалното соопштение на Независниот синдикат на возачите на ЈСП „Скопје“.
И од ЈСП „Скопје“ излегоа со свое соопштение, со кое ги информираат сите свои вработени дека ќе добијат зголемување на платите.
– Веќе од наредната плата секој вработен во ЈСП „Скопје“ независно од работната позиција и статутот на вработувањето (преку Агенција за привремени вработувања, на определено време и слично), ќе добие покачување од 2.800 денари. Покачувањето е регулирано и со Одлука на Управен одбор на ЈСП „Скопје“, донесена на 19.4.1022 година. Со оваа одлука нема да бидат опфатени вработените што добија покачување со Законот за минимална плата – стои во официјалното соопштение на претпријатието до вработените.
Инаку, колку за потсетување, Независниот синдикат на Јавното сообраќајно претпријатие минатата недела најави дека во обид да добијат повисоки плати, вработените со мирен протест ќе го искажат својот револт.
Веднаш по ваквата најава, од ЈСП „Скопје“ излегоа со своја реакција тврдејќи дека најавениот протест е политички мотивиран, бидејќи одлуката за зголемување на платите на возачите веќе била донесена.
– Во врска со најавеното излегување на протест од страна на Независниот синдикат во ЈСП „Скопје“, сакаме да информираме и да укажеме дека ваквиот вид политички мотивирани дејства се неприфатливи и штетни за целокупното работење на претпријатието и на штета на граѓаните, корисниците на јавниот превоз. Јавноста и вработените треба да бидат информирани дека Управниот одбор на ЈСП „Скопје“ на 19.4.2022 година ги прифати барањата на Независниот синдикат со Одлука за линеарно зголемување на платите во износ од 2.800 денари. Поради ова ги осудуваме ваквите дејства и апелираме дека со политички мотивирани манипулации поттикнати од центри на политичка моќ, нема да се придонесе кон развој и унапредување на статусот на вработените во ЈСП „Скопје“, напротив, ќе доведат до непоправлива штета што негативно ќе влијае врз работните процеси и статусот на вработените во претпријатието, како и за граѓаните воопшто – соопшти ЈСП „Скопје“.
Слободен Печат
