Турција сепак нема да ги блокира Финска и Шведска за влезот во НАТО.
Финскиот претседател Саули Ниинисо објави дека лидерите на трите држави потпишале заеднички договор. Меморандумот „потврдува дека на самитот во Мадрид, Турција ќе ја поддржи поканата за членство на Финска и Шведска во НАТО“.
Двете нордиски земји побараа членство во Алијансата по руската инвазија врз Украина, откако претходно со децении опстојуваа на својата неутралност. Но, турскиот претседател Реџеп Таип Ердоган го блокираше членството, инсистирајќи дека двете држави прво мора да го сменат ставот кон курдските бунтовнички групи кои Турција ги смета за терористи. Канцеларијата на Ердоган соопшти дека Турција „го добила тоа што го сакала“ пред да дозволи членство на Шведска и Финска.
Двете земји наводно се согласиле „во целост да соработуваат со Турција во борбата против курдската ПКК“ и други милитантни групи. Шведска и Финска се согласиле и да го укинат ембаргото на извоз на оружје за Турција, кое беше наметнато како одговор на турската инвазија врз Сирија во 2019 година.
