Би било добро доколку би можел Бујар Османи да биде во Владата на Република Албанија, изјави денеска албанскиот премиер на прес-конференција на која тој зборувал за учеството на Самитот на НАТО во Мадрид, каде бил во чест контакт со македонската делегација, со министерот Османи и со францускиот претседател Емануел Макрон.
Бевме во постојан контакт, континуирано разменувавме мислења за динамиката на евро – процесот, а во центарот на процесот беше личност за која би бил многу среќен доколку имаме можност да го имаме на располагање во владата на Албанија. Бујар Османи! Тој е супер! Бујар беше личноста која го водеше процесот од страната на Северна Македонија.Јас само помогнав колку што можев“, изјави премиерот Рама.
Албанскиот премиер во изминатиот период даваше интересни изјави, дојде и во конфликт со бугарското МНР кое му забележа за „неговиот речник“ кога за Софија се прелеала чашата заради неговата досетка „Источна Македонија“.
Денеска Рама ѝ порача на Македонија дека бугарското однесување не било европско, но дека последниот предлог е добар и дека треба да се прифати.
Албанија и Македонија се во пакет за добивање на датум за преговори со ЕУ, а поради бугарското вето за Македонија со години е запрено и напредувањето на Албанија во евроинтегративниот процес.
