Вчера попладне на раскрсницата на улицата „Бел камен“ во Кочани се случи инцидент во кој нападнати биле и претепани тројца вработени во КЈП Водовод.
По дефект на водоводната мрежа кој настанал при раскопување на улицата од вработени во една градежна компанија, при обид на вработените од КЈП да го санираат дефектот, седуммина револтирани граѓани поради недостатокот на вода, ги нападнале и претепале. Кај едниот од вработените констатирани се повреди на главата, кај вториот скршеници на ногата, а третиот поминал со полесни телесни повреди.
„Во моментов преполовена ни е групата за одржување на водоводната мрежа, која брои само околу 6-7 вработени“, изјави за Радио Кочани техничкиот директор, Драганчо Ставрев и додаде: „Секојдневно се случуваат по 5-6 дефекти, вклучувајќи викенди и празници. Овие вработени и така беа оптоварени, санирајќи ги преќините за напојување со чиста вода за пиење од градскиот водовод. Вкупната водоводна мрежа, примарна и секундарна е со должина од 160 километри, а околу 200 километри изнесува приклучната мрежа до потрошувачите. Останавме со половина екипа од групата за одржување и ќе биде навистина тешко по инцидентот во период на годишните одмори да одговориме на сите предизвици. Се надеваме повредените колеги што е можно побргу да ни се вратат“, заврши техничкиот директор на КЈП „Водовод“.
Јавува радио Кочани
