Нашето Собрание усвои заклучоци кои даваат јасна рамка на дејствување дека ништо поврзано со јазикот, нашиот македонски јазик идентитетот и културната посебност, обележјата на еден народ нема да биде под прашање доколку тоа се отвори во кој било момент. Ние секако дека за тоа ниту ќе разговараме, ниту имаме намера да преговараме, ниту пак тоа е дел од европските правила. Значи ништо од тоа не е во рамките на европските критериуми и затоа сме сигурни и се чувствуваме сигурни да влеземе во овој процес и да ја чекориме напред, затоа што доволно беше чекање и блокади 17 години, изјави вицепремиерот Маричиќ во синоќешното издание на „Трилинг“.
Вицепремиерот за европски прашања Бојан Маричиќ најави дека за уставните измени ќе се отвори дијалог со сите партии и сите пратеници ќе имаат можност во наредниот период, да се изјаснат на која страна на процесот ќе бидат, дали за ЕУ и продолжување на тој пат или за нови застој и блокади.
– Јас сум убеден дека мудро ќе одлучат пратениците во тој нареден период, имаме доволно време да разговараме со сите и да ги убедиме и се надевам исто така и дека опозицијата ќе го разбере овој процес колку е важен и колку е важно да се обединиме околу ова, додаде Маричиќ.
На прашањето за можно купување гласови на пратениците, вицепремиерот Маричиќ кажа дека во последните 5 години никогаш немало купување на гласови во нашето Собрание, а тоа што успеале во еден значаен процес да се направи, да убедат определен дел од пратениците на ВМРО-ДПМНЕ да гласаат „за“, во случајот за Договорот од Преспа, било една сериозна задача, којашто требаше да нè внесе во НАТО.
Пред нас е уште една таква задача, а тоа е продолжување на патот на преговорите со ЕУ, бидејќи веќе ги започнавме. Мислам дека треба секоја политичка партија и секој пратеник да има доволно чувство на одговорност во наредниот период. Ќе има време да се одлучи дали е за патот на ЕУ или е против. Мислам дека е тоа дилемата, не е ништо друго. Содржински уставните измени којшто сега треба да ги направиме се далеку понепроблематични, од тоа што сме правеле во минато со Договорот од Преспа. Ова сега е додавање на уште неколку заедници или групи во нашиот устав што отсекогаш бил наша вредност, ништо ново, ништо поразлично, додаде Маричиќ.
