Ако одлуката на историската комисија за Цар Самуил се соопштеше уште во 2019 година кога е и донесена, и ако таква одлука се донесеше и за Гоце Делчев, немаше да дојде ни до рамковниот став на Бугарија, ниту до конечното одложување на почетокот на преговорите, вели бугарскиот европратеник Андреј Ковачев, пренесува БГНЕС.
„На светската историографија отсекогаш ѝ било јасно дека цар Самуил, Гоце Делчев, браќата Миладиновци или кој било друг сонародник преродбеник или револуционер од Македонија, се се Бугари и се дел од бугарската историја. Доволно е да се отвори која било странска енциклопедија, различна од онаа што е напишана во Скопје, и можете да ги видите, сите ‘контроверзни’ историски личности и теми дека се јасно дефинирани и претставени како целосно бугарски“, рече Ковачев.
Тој за последните политички коментари во Македонија вели дека не само што нема да помогнат, туку дека ќе го спречат европскиот развој на земјата.
„Признавањето на цар Самуил за бугарскиот император и неговото кралство за бугарско од македонскиот дел од мешаната историска комисија несомнено е сериозен чекор напред во однос на исполнувањето на Договорот за пријателство и добрососедство од 2017 година и усвојувањето на заедничка историја меѓу Бугарија и Северна Македонија“.
Европратеникот верува дека и покрај острата реторика на некои македонски политичари, договорот, протоколите кон него, преговарачката рамка, објективизацијата на историјата и промените на наставните програми, многу брзо ќе станат факт.
„Колегите од Скопје и претседателот Пендаровски мора да разберат дека тоа не се ‘препораки’ кои не значат ништо, туку задолжителни услови поставени во преговарачката рамка, кои мора реално да се исполнат за да се способни да го продолжат процесот на приклучување кон ЕУ, не само за правда, не само за нас, туку најмногу за споменот на нашите заеднички бугарски претци. Вистината нема да ги повреди сегашните чувства на луѓето од двете страни на границата, а ќе не направи посилни заедно во нашиот заеднички европски дом“, рече бугарскиот европратеник.
