Првиот човек на Град Скопје откри дел од мерките што се вклучени во планот за штедење на електрична енергија на Градот и истакна дека некои мерки сè уште се дефинираат
Секоја општина си креира мерки за штедење, тие имаат своја економија на одлучување, а Град Скопје веќе донесе долгорочни мерки, како и план за транзиција кон алтернативните извори за енергија, додека истовремено изготви и насоки за сите објекти што се под надлежност на Град Скопје за тоа на кој начин да функционираат, изјави денеска градоначалничката на Град Скопје, Данела Арсовска, зборувајќи пред новинарите за сеопфатниот план за штедење на електрична енергија со мерки за намалување на потрошувачката на струја, кој го изработил Градот.
Арсовска посочи дека овој план вклучува повеќе различни мерки за заштеда на електричната енергија, но нагласи дека Градот тоа нема да го направи со исклучување на јавното осветлување на улиците и булеварите.
„Град Скопје пристапи кон намалување на интензитетот на јавното осветлување, но Скопје нема под ниту еден услов да го исклучи јавното осветлување на улиците и булеварите, првенствено поради безбедноста и сигурноста на скопјани. Ние ќе направиме сè што е возможно да се намалат трошоците на струја, но не врз грбот на граѓаните и не со загрозување на безбедноста на Град Скопје“,
изјави Арсовска.
Во врска со јавното осветлување, Арсовска истакна дека јачината на ЛЕД-светлата ќе се намали на 70 проценти, а осветлувањето ќе се менаџира во временски интервали и ќе има етапна замена на осветлувањето со ЛЕД-светилки.
„Дел од мерките за заштеда вклучуваат штедење со намалување на интензитетот на јавното осветлување, максимум до 70 отсто, етапна замена и користење на ЛЕД-светилки наместо обични или флуросцентни, рационално користење на електричните уреди во секој од објектите во јавните претпријатија, како и сведување на сите непродуктивни трошоци на Град Скопје на нула, односно прекин на праксата на купување луксузни стоки“,
истакна Арсовска зборувајќи за дел од мерките за заштеда на Градот.
Градоначалничката истакна и дека долгорочно е препорачано да се постави адаптивна термичка заштита и интегрирање на обновливи извори на енергија, така што ќе се постават соларни панели на објектите што влегуваат под надлежност на Град Скопје.
