Осуммина пливачи, седум во машка конкуренција и една девојка ја започнаа трката на овогодинешниот 35-ти Охридски пливачки маратон.
Стартот го означи градоначалникот на Општина Охрид, Кирил Пецаков од Св. Наум во точно 10 часот. Маратонците пливаат на патеката „Климе Савин“ до Охридското пристаниште во должина од 25 километри.
Во категоријата мажи се натпреваруваат домаќините Александар Илиевски и Евгениј Поп Ацев, Арне Фурлан Штулар од Словенија, Франческо Гетини од Италија, Матијас Дијас Хернандес од Аргентина и Сидрит Деску и Арион Будима од Косово. Единтвената девојка на годинашното маратонско издание е аргентинката Рита Ванеса Гарсија.
И годинава за безбедноста на пливачите во вода, но и на копно се грижи ОО Црвен крст Охрид. Утрово пред почетокот на трката претседателот на организацијата, Сашо Точков истакна дека како и секоја година се преземааат мерки за безбедност согласно стандардите на ФИНА.
Секој пливач треба да се чувствува безбедно, обезбедена е придружба од чамец за секој пливач, резервни чамци, но секако направен е и посебен план за евакуација во случај на некое непредвидливо време, посебно денес кога се најавува и посилен ветер после 12 часот. Сите мерки се преземени, на самата стаза ќе има четири медицински екипи, една медицинска екипа со амбуланстко возило ќе биде постојано по патот, од Св. Наум до Охрид ќе ја следи трката и на целта имаме две медицински екипи со амбулантско возило кои што ќе ги пречекуваат пливачите и доколку има потреба да се пружи некоја помош. Години наназад сме имале доста интервенции и имаме доста искуство и се надевам дека се ќе биде во ред. Во однос на временските услови имаме детални информации и истите уште вчера им беа соопштени на пливачите на техничкиот состанок, дека ќе имаме променливо облачно време, нема да има дожд, но ќе има посилен ветер од југозападен правец чиј интензитет ќе се зголеми после 12 часот. Токму затоа и правецот на патеката е така наместен да не се оди спротвно на брановите на запад, но одиме кон север од јужната страна, за да им биде побезбедно на самите пливачи. Температурата на водата по целата патека е од 22 до 24 степени, а на воздухот од 27-28 степени, така што очекуваме, покрај ветарот, дека се ќе помине во најдобар ред, рече Точков.
И покрај што државата беше глува за овогодинешниот Охридски Марататон претседателот Пендаровски прв пристигна да се фотографира со маратонците…
