Денес во просториите на фабриката „Макстил“ беа уништени околу 10 тони различни видови на наркотични дроги одземени до август 2022 година, врз основа на правосилни судски одлуки и врз основа на судски решенија. Станува збор за повеќе од 8,2 тони марихуана, околу 100 килограми хашиш, хероин и кокаин, над 1000 растенија, семки од канабис, како и 1,2 милиони парчиња психотропни супстанци, што преставува најголемо количество на уништена дрога во земјата, чија вредност на црниот пазар би била 26 милиони евра, информира министерот за внатрешни работи Оливер Спасовски.
Спасовски нагласи дека оваа уништена количина е резултат на бројните акции што ги спроведуваат изминатите години.
-Уништувањето се изврши во организација на Министерството за внатрешни работи, Агенцијата за управување со одземен имот и Државната комисија за уништување на наркотични дроги. Бројките говорат за напорите и за бескромпромисниот став што го преземаме. МВР и сите организациски единици за сузбивање на дрога продолжуваат со овој приоритет. Посебна благодарност до сите колеги што работат во овие оддели за сузбивање на дрога, истакна Спасовски.
