Повторно немавме напредок во разговорите, во Македонија не постои подготвеност за промени. Тврдењето доаѓа од копретседателот на Мешовитата историска комисија од бугарска страна, по минатонеделната средба на историчарите во Скопје.
Тој оценува дека ова се должи на политичките притисоци кои ги трпи македонскиот дел од Комисијата.
“Немаше некакви посебни тензии во разговорите меѓу нас, но многу добро ја забележав вознемиреноста кај дел од колегите. Некои од нив сосема отворено кажаа дека се подложени на закани и притисок ако нешто сменат во своите ставови…”
Ваквото тврдење Димитров го поткрепува и со студијата на Конрад Аденауер објавена вчера, во која 44 отсто од македонските граѓани сметаат дека најголем непријател на Македонија е Бугарија.
Неподготвеноста за промени во Македонија, Димитров ја гледа во спората имплементација на усвоените препораки за промена на учебниците.
“Еден учебник не се менува од денес за утре, но можат да се направат дополнувања без да се печатат наново…”
За копретседателот од македонскиот дел од Комисијата, пак, ова се лични, субјективни тврдења на неговиот бугарски колега, кои имаат дневнополитички потреби.
“Јас не би сакал да коментирам политички изјави, бидејќи ова е токму таква изјава на копретседателот од бугарска страна Димитров. Со ваквиот настап за жал се политизира работата на Комисијата. Ваквите изјави ја нарушуваат довербата меѓу членовите и атмосферата за работа”, смета Ѓоргиев.
Тој вели дека за примена на препораките сега е надлежно Министерството и Бирото за образование, а на обвинувањата возвраќа дека процесот на промени на учебниците не е почнат ниту во бугарското општество.
