Чешмата кај некогашното познато излетничко место Кисела Вода во близина на Битола попладнево однесе уште два човечки животи.
При полнење на минерална вода од јаглеродниот моноксид што повремено излегува кај јамскиот извор се задушија двајца битолчани на возраст од 63 и 68 години.
Неофицијално станува збор за двајца браќа кои полнеа вода, за што сведочат и торбите со шишиња покрај опасниот извор.
При извлекувањето на нивните тела учествуваше и Територијалната противпожарна единица, а тројца пожарникари со специјална опрема ги извлекоа телата на починатите, кои се предадени на обдукција
„Во 16.24ч. од Итна медицинска помош во СВР Битола било пријавено дека кај изворите на кисела вода на место викано.„Сребрена вода“ во близина на битолската село Крстоар, имало две починати машки лица. За настанот е известен јавен обвинител. Од страна на екипа од Итната помош била констатирана смрт. По наредба на јавен обвинител, телата на починатите се предадени за обдукција, соопштија од СВР Битола.
Голем број битолчани полнат вода од овој извор кој се наоѓа во јама длабока околу 2 метри, и покрај тоа што е означен како опасен.
Во последните децнии од отровниот гас кој повремено излегува, се задушиле повеќе лица, поради што е позната како чешмата убиец.
Последен пат овде загина 77 годишен битолчаненц во 2008 година, а 4 години претходно, две лица на истото место се задушија од јаглеродниот моноксид.
Но, за да се спречат вакви трагедии, чешмата никогаш не е извлечена над јамата.
Емилија Мисирлиевска
