Кулата на највисокиот врв на Шар Планина, Титов Врв (2747 метри), која служи за одмор и заштита на планинарите при неповолно време, е дивоградба.
Оваа информација за „Фокус“ ја потврдија општинските власти на градот под Шара, Тетово. Кулата е градена во 1956 година од членови на Федерацијата на планинарски спортови на Македонија.
„Во тоа време биле градени повеќе вакви прифатни наменски објекти низ државата, кои всушност се водат како дивоградби, а треба да се легализираат на име на Федерацијата на планинарски спортови во РСМ. Општина Тетово го разгледува случајот“, ни соопштија од Општина Тетово.
Искусниот планинар и некогашен член на претседателството на ФПСМ, Живко Темелковски појасни дека за овој проблем барале решение пред неколку години.
„За оваа проблематика околу кулата на Титов Врв ние како Федерација баравме решение уште кога Теута Арифи беше градоначалник на Тетово. Тешко доаѓавме во комуникација со неа, а со Касами беше подруго. Верувам дека ќе се направат напори од надлежните институции за овој проблем да биде решен во најбрз рок“, ни истакна Темелковски.
Оваа кула години наназад се соочуваше со разни проблеми, од нејзино палење, до крадење на прозорците и вратите, но љубителите на планинарскиот спорт неколкупати ја обновуваа и ја подобруваа нејзината безбедност.
Македонија од памтивек има проблем со дивоградбите кои никнуваат како печурки во заштитени подрачја, но и во градските средини од нашата земја.
ФОКУС
