ВМРО-ДПМНЕ, на прес-конференција на која говореше пратеникот Зоран Коцевски, побара одговорност и оставки од министерот за внатрешни работи Оливер Спасовски и од неговиот заменик Назим Буши, поради дивеењето на синот на заменик министерот со возило со флешери, кое не смее да остане неказнето.
„Црниот мерцедес со флешери со кое Керим Буши на 26 ноември дивеел низ Скопје е возило кое било во сопственост на Назим Буши, а потоа предадено на битолска фирма. МВР сето тоа го знае, доволно е само да се погледне историјатот на промени на сопственост. МВР само требаше да одговори дали црниот мерцедес е купен од Телеком за Назим Буши, а потоа продаден на самиот Буши, за истиот да го предаде на битолска фирма. Но МВР молчи“, нагласи Коцевски.
Ако немаше случај, немаше да биде казнет заменик началникот на СВР Скопје кој интервенирал возилото и лицето да бидат пуштени, со објаснување дека се работи за познат човек.
„А кој е тој познат човек, во возилото претходна сопственост на Назим Буши, сега во посед на битолска фирма сопственост на негови роднини, ако не е неговиот син, Керим Буши? Оливер Спасовски и Назим Буши не смее да го заташкуваат целиот инцидент. Политичка одговорност мора да има“, рече Коцевски.
