Автопатот од Кичево до Охрид стана вечен проект, веќе шеста година од владеењето на СДСМ и ДУИ, роковите од 2019, 2021 се пробиени, а изгледа и 2023 нема да се оствари имајќи ја ситуацијата на терен, додека се поизвесно е дека новиот рок за завршување ќе биде 2026 година.
Стои во место и автопатот од Скопје до Блаце во должина од само 10 километри, но во таква ситуација вицепремиерот Артан Груби вети автопат со 6 ленти до Тирана.
Потпретседателот на Владата за политички систем и односи меѓу заедниците, денес во Тирана потпиша договор за соработка меѓу Владата на Македонија и Владата на Албанија за развој на инфраструктурни проекти, логистичка безбедност и ефикасност на транспортот на стоки меѓу двете земји.
Според Груби, овој проект ги надминува димензиите на национален проект и е од стратешко значење за развојот на Западен Балкан, а со него се предвидува изградба на автопат со 6 ленти од Скопје до Ќафасан, со што растојанието помеѓу Скопје и Тирана ќе се намали на 2,5 часа,а меѓу Скопје и Валона на 3 часа.
-За максимално искористување на пристапот до пристаништето, планираме да ја започнеме и железничката врска Скопје – Кичево – Поградец – Драч. Во јануари ги спојуваме двете гранични контроли во една, со цел конечно да ги отстраниме границите меѓу нас. Ја градиме и интерконективната енергетска врска меѓу нас со два проекта, трафостаница во Охрид и високонапонска врска Битола-Елбасан.
-Бројни се скептиците кои не веруваат во реализација на проектите што ги имаме започнато за да бидеме заедно, за да ги отстраниме границите меѓу нас, бројни се и ќе бидат оние кои ќе се обидат да направат опструкции, да ја потценат нивната тежина, но наша должност е да продолжиме со работа размислувајќи за идните генерации и за она што можеме да им го оставиме денес како наследство и основа за здрава иднина, рече Груби во Тирана.
Тој додаде дека со премиерот Рама на заедничката седница меѓу нашите две влади било разговарано и за изградбата на суво пристаниште во градот Струга, нова и креативна димензија на комуникација која е придонесе за зајакнување на трговската размена меѓу двете земји и е составен дел од изградбата на новото пристаниште Драч.
