Училишниот совет во ОУ „Гоце Делчев“ од струмичко Босилово ќе одлучува за тоа какви постапки или дисциплински мерки ќе бидат преземени за ученичките кои вчера исчезнаа осум часа во центарот на Скопје, додека по нив трагаа полицијата, роднини и граѓани.
Директорот на училиштето, Стево Божинов, за „Фокус“ потврдува дека ученичките по кои се трагаше во иднина ќе бидат суспендирани од сите планирани училишни екскурзии.
Станува збор за екскурзија во која учествуваа 123 ученици и 19 наставници. Значи, еден наставник бил задолжен за шест до седум ученици, што значи дека тоа е доволен број за да се има контрола над ситуацијата. По посетата на саемот групата дошла во „Веро Џамбо“, бидејќи туристичката агенција која е организатор имала договор со некој од рестораните, каде децата ручаат, а потоа било предвидено да се прошетаат во кругот на трговскиот центар. Заминувањето беше планирано во 16 часот, групата се собрала во 15.50, а двете ученички се одделиле под изговор дека го заборавиле паричникот“, вели Божинов за „Фокус“.
Наставнички го пријавиле исчезнувањето на девојчињата на возраст од 12 и 14 години околу 16 часот, откако не се појавиле во договореното време за тргнување кон дома. По масовната потрага на МВР, но и на голем број граѓани, кои самоиницијативно се организираа преку социјалните мрежи, ученичките беа пронајдени десетина минути пред полноќ, од страна на полицијата, во близина на Стара рампа во Кисела Вода.
Според МВР, девојчињата биле пронајдени во добра состојба, но поради нивната возраст не можат да откриваат повеќе детали во јавноста.
