Елена Доцевска Божиновска, член на Советот на Куманово од редовите на ВМРО-ДПМНЕ, објави на социјалната мрежа „Фејсбук“ дека ја добила битката пред Меѓународниот суд за човекови права во Стразбур.
За потсетување, Доцевска Божиновска последните месеци од 2017 година беше притворена и одлежа неколку месеци во затвор поради учество во насилниот упад во Собранието на 27. април истата година.
„Ја добивме битката во Стразбур! Може да забави, но не и да се заборави… После повеќе од 5 години, стигна првата пресуда за „27. април“ од Европскиот суд за човекови права!“ – пишува Божиновска на својот профил на Фејсбук, без да наведе повеќе детали за каква пресуда и за каква тужба станува збор.
Во времето на „Крвавиот четврток“ Елена Доцевска-Божиновска беше вработена во кабинетот на тогашниот претседател на Собранието Трајко Вељаноски, и беше една од 33 обвинети за терористичко загрозување на уставниот поредок. Таа подоцна беше меѓу петнаесеттемина од обвинетите, кои беа опфатени со Законот за амнестија.
