Најважно е зголемувањето на довербата во институциите и подигнувањето на јавната свест кај граѓаните е тие да пријавуваат корупција, изјави министерот за внатрешни работи Оливер Спасовски во емисијата „Утрински брифинг“.
Тој рече дека работат на тоа секој имот кој е нелегално стекнт, државата да го одземе и да го врати на граѓаните.
„Секој еден од нас може да помогне во овој дел. Ако споредиме 2021, 2022 со 2023, од година во година имаме сериозно зголемување во делот на откривачка дејност за корупција. Како МВР, борбата против корупцијата ја ставаме во врвните приоритети и ги ангажираме сите расположливи ресурси и капацитети. Борбата против корупцијата е важна за да имаме напредок во општеството. Корупцијата ги јаде работните места, ги јаде инфраструктурните проекти, разорува комплетно сѐ во државата, а криминалците создаваат богатства кои ги стекнале на нелегален начин. Се водат финансиски истраги за сите кривични дела. Тоа го започнавме од 2017 година, со формирање на посебни оддели, и паралелно работиме, со секоја истрага да имаме и финансиска истрага. Оној имот кој е стекнат на нелегален начин да се одземе од страна на државата и да се врати на граѓаните”, рече Спасовски во емисијата „Утрински брифинг“.
Тој објасни дека од почетокот на оваа година до мај, од Одделот за спречување на организиран и сериозен криминал, поднесени се четири кривични пријави за злоупотреба на службена положба и овластување, против еден градоначалник и вработени во општината Неготино.
„Имаме кривични пријави против десет лица вработени во АД за изградба и стопанисување со станбен простор и со деловен простор, за период 2021-2016, за сериозно оштетување на Буџетот од околу 45 милиони денари. Имаме реализирани акции во СВР Штип, СВР Охрид, СВР Битола, СВР Велес, а кривично се пријавени вкупно 20 лица. Па за ЈП „Национални шуми”, за превозници, во делот на дрвна маса и пустошење на шуми… понатаму, имаме кривични пријави за примање поткуп на граничните премини Богородица и Ќафасан“, изјави министерот Спасовски.
Разговарајќи на темата за спречување на корупција, Спасовски упати и апел до граѓаните да продолжат со трендот на зголемување на пријавите.
„Постои посебен телефонски број за анонимно пријавување на сите случаи на корупција. Апелирам, секој еден кој се вклучува во активност на барање поткуп и корупција, без разлика кој е, да биде пријавен и да сноси последици. Знаете дека минатата недела, во еден ден имавме два случаи на спречување корупција, по пријавување од страна на граѓаните и преку соработување – и двата случаи беа реализирани”, рече Спасовски.
