Поранешиот претседател Бранко Црвенковски не е оптимист за пробив во евроинтеграцијата на земјите од Западен Балкан, вклучувајќи ја и Македонија. Според него, регионот стои во место нема простор за оптимизам во наредните неколку години. Тој додава дека интеграциите на земјите од Западен Балкан се во застој со повремени мали исчекори.
„За мене се прилично нелогични и без реална поткрепа изјавите, без разлика од каде и од кого доаѓаат, дека ако сега ги отпочнеме преговорите за седум, па дури некои се и поголеми оптимисти и велат за четири до пет години, ќе станеме полноправна членка на Унијата. Или дека војната во Украина создава нов моментум кој ќе го забрза процесот на проширувања. Можеби грешам“, изјави Бранко Црвенковски – поранешен претседател.
Црвенковски нагласи дека највлијателните земји-членки на ЕУ опстојуваат на ставот – прво реформи внатре во Унијата, па потоа проширување. Поранешниот шеф на државата смета дека дополнително неисполнетите ветувања на Брисел го зголемуваат и евроскептицизмот. Затоа, тој предлага нова регионална, пред сè економска иницијатива, која заеднички треба да им се презентира на европските институции.
„За нас, земјите од Западен Балкан е најбитно, а во исто време не задира во и онака компликуваното одлучување во рамки на ЕУ. Тоа е пристап до заедничкиот пазар и пристап до заедничките фондови. Најдиректно кажано, иницијативата би се однесувала на овозможување на овиде две цели. И повторно ќе напоменам за да нема никаква забуна. Ова не би било никаква алтернатива или супституција на полноправното членство во ЕУ“, рече Бранко Црвенковски – поранешен претседател.
Црвенковски, на дебатата „Северна Македонија меѓу Отворен Балкан и Берлински процес – можно ли е побрзо членство во Унијата“, во организација на Советот на амбасадори, порача дека новата иницијатива што ја предлага тој би била преодна фаза до полноправното членство, кое сега го оцени како статус-кво ситуација.
Лука Андреев Alsat
