Времето врви, од градежна механизација ни трага ни глас.
Ништо не е променето кај автопатот Тетово – Гостивар откако пред 20 дена работници со механизација ископаа една дупка за трет почеток на изградбата на Коридорите 8 и 10д.
-Два и пол месеци по првата церемонија која се одржа на 50тина метри од другата страна на патарината Тетово, се одржаа уште две церемонии за одбележување на почеток на изградбата на Коридорите 8 и 10д. Денеска на терен нема ниту работници, ниту градежна механизација, ниту пак забележавме дека се прават геодетски испитувања.
Иако на терен нема ништо, надлежните уверуваат дека се работи со полна пареа.
-Да, започната е работата. Тој договор е веќе потпишан. Според договорот, прво започнуваат геомеханички истражувања коишто веќе се започнати, започнува фаза на проектирање. Бидејќи се работи за проектирање и изградба. Тие веќе работат согласно своите процедури. Имаат договор којшто е валиден. Исплатен е е аванс. Точната сума можат да ви ја дадат од Јавното претпријатие за државни патишта, вели премиерот Ковачевски.
Токму авансот за кој премиерот Ковачевски постојано топката ја префрла кај ЈПДП, е едно од неколкуте прашања кои ги доставивме до Државни патишта.
Добивме краток одговор на трите прашања без премногу детали. Од Државни патишта велат дека на Бехтел и Енка исплатени им се 117 милиони евра.
-Градежните работи на Коридорите 8 и 10д се отпочнати. Во моментов на трите делници се вршат подготвителни работи, геомеханички испитувања, подготовка за изградба на кампови и други активности. Во однос на исплатата Јавното претпријатие за државни патишта до овој момент има извршено една исплата во вкупен износ од 117 милиони евра кон изведувачот на работите, велат од ЈПДП.
Коридорите 8 и 10д уште од самиот старт ги тресат скандали. За надзор беше избрана фирма која претходно произведувала долна облека. Предмет отвори и Јавното обвинителство за гонење на организиран криминал, но тој се уште е во предистражна постапка.
Сител Тв
