НА ДЕНЕШЕН ДЕН 25 јуни 1906 прилепскиот војвода Ѓорѓи Ацев, по тешка борба против великосрпска платеничка чета, бил ранет и за да не падне жив во рацете на непријателот се самоубил.
По една акција на четата на војводата Ацев кај селото Крапа, кај Македонски Брод, против една великосрпска платеничка чета, војводата бил ранет, а за да не биде заробен, се самоубил. Тој е брат на познатите македонски војводи Мирче и Петар Ацев. Роден е во селото Ораовец, Прилепско, според едни извори во 1883, а според други 1884 година.
Ѓорѓи (Гога) Ацев кој носел и псевдонимот Срцето по завршувањето на Педагошкото училиште во Скопје, работел како учител во Тиквешко. По Илинденското востание се приклучил кон ВМОРО, како четник во четата на неговиот брат Петар, а од 1905 година бил војвода на своја чета. Во текот на својата четничка кариера, Ѓорѓи Ацев водел повеќе борби против турските власти и против србомански и грчки андартски чети во Македонија.
Во септември 1905 година, во близина на селото Полог, ги разбил гркоандартските чети на Маринос Либеропулос, составени од Критјани и гркомански – грковлашки четници.
На 25 јуни 1906 година бил предаден при извршување на казнена акција во селото Крапа при што неговата чета била нападната од четата на србоманскиот војвода Григор Соколов(иќ) – Ламе.
(фото: Војводата Ѓорѓи Ацев (лево), Наум Јосифов (во средината) и Петар Георгиев (десно)
