Последно во низата настрада возилото „Рено клио“, неофицијално во сопственост на 50 годишен затворски стражар, во населбата Илинден.
Според информациите на МВР, тоа било опожарено ноќеска во 3 и 5 минути, при што била зафатена и гаражата во која било паркирано и била причинета материјална штета. Мотивите за пожарот не се познати, а за среќа, немало повредени лица.
„На 26.06.2023 во 03.05 часот во СВР Скопје било пријавено дека во населба Илинден биле опожарени гаража и патничко моторно возило „рено клио“ со скопски регистарски ознаки, сопственост на Г.Б.(50) од Скопје. Повредени лица нема. Увид на местото на настанот извршила екипа од СВР Скопје и се преземаат мерки за расчитсување на случајот“, информираат од Министерството за внатрешни работи.
Инаку, во април, двапати за три дена изгореа автомобили на функционери од затворот „Идризово“. Меѓу опожарените возила беше и тоа на заменикот директор Феми Јонузи. Неговиот службен автомобил изгорел додека тој бил во џамија.
Пред тој настан, беше запален автомобил на командирот, Африм Реџепи пред неговиот стан, кој ваквиот случај тогаш го оцени како напад врз државата.
Кој стои зад овие веројатно организирани подметнувања, никогаш не се откри, иако сомневањата се дека станува збор за одмазди на некои од затворенциите.. Неодамна во Идризво беше откриен и тунел за бегство, но ниту за овој случај досега нема пријавени. Се уште во истрага е и случајот со филмското бегство на затвореникот Беким Мемети од кого веќе 6 месеци нема ниту трага ниту глас.
