Министрите на ДУИ потпишале оставки и ги испратиле до премиерот Димитар Ковачевски. Во писмото кое стигнало на адреса на Влада е наведено дека оставките стануваат ефективни веднаш откако опозицијата ќе гласа за менување на Уставот, потврди за Сител министерот за надворешни работи и потпретседател на ДУИ, Бујар Османи.
,,Ние, министрите и владините функционери од редовите на Демократската унија за интеграција, поднесуваме оставки од функциите што во моментов ги извршуваме! Оставките, г. Премиере, автоматски се ефективни во моментот кога опозицијата ќе ги изгласа уставните измени“, се вели во дел од писмото кое го испратиле министрите на ДУИ до премиерот Димитар Ковачевски.
Ова е само дел од писмото кое лидерот на интегративците Али Ахмети го прочитал на настан со дијаспората во Тетово.
Власта очекува дека до седницата закажана за 18-ти август сите пратеници ќе дадат поддршка за уставните измени и покрај цврстиот став на ВМРО-ДПМНЕ дека нема да се согласат на уставни измени под бугарски диктат.
Засега е јасно дека мнозинството нема обезбедено 80 пратеници, за да биде изгласана потребата за отворање на Уставот за вметнување на бугарската и уште пет други заедници. И Османи потврди дека во моментов недостасуваат уште осум пратеници за гласањето, но според него добро било што во Собранието почнала дебатата за уставните измени.
