Македонскиот јазик е посебен словенски јазик како бугарскиот, хрватскиот, српскиот. Сегашните проблеми ќе се решат некако, важното е дека македонскиот јазик постои и ќе продолжи да постои и точка. Тоа го истакна проф. д-р Виктор Фридман од Универзитетот од Чикаго, еден од најголемите американски и светски слависти кому денеска во Охрид му беше врачена Светската награда на хуманизмот за 2023 година.
Професорот Фридман забележа дека повеќе од јасно е оти македонскиот јазик се разликува и од српскиот и од бугарскиот на секое лингвистичко ниво, од фонологија, преку морфологија, до лексика, синтакса…
– Сличности има, но Швеѓаните и Норвежаните можат да се разберат кога се сретнуваат, а никој не вели дека норвешки е шведски дијалект или обратно, нели? Во тоа е работата, дека Скандинавците се многу понапреднати од Бугарите – изјави Фридман.
Професорот, кој повеќе од 50 години го учи, истражува и зборува македонскиот јазик, рече дека воопшто немал претстава дека македонскиот јазик ќе предизвика проблеми какви што сега произлегуваат од соседите.
Како остар критичар на политиките на Бугарија кон Македонија во однос на македонскиот јазик, во една прилика тој ја оцени актуелната бугарска политика за фашистичка.
– Да. Затоа што во времето на фашизам кога Бугарите ја окупирале Македонија, и тоа беше окупација, ги тепале децата кои зборувале македонски…Тоа е фашизам. Во времето на фашизам, македонски бил бугарски дијалект, сега што велат Бугарите за македонскиот јазик дека бил бугарски дијалект е исто како во фашистичкото време – рече тој.
Истовремено, тој смета дека Европа е таа што треба да стави крај на сето тоа, а на Македонија е да остане цврста во одбраната на посебноста на македонскиот јазик.
Кога станува збор за бугарските забелешки и оспорувања по однос некои од историските прашања, професорот нема намера да навлегува во историјата на средновековието како Цар Самуил, но цврст во одбраната на вистината кога станува збор за поновата историја.
– Оваа работа со Цар Самуил е многу компликувана и јас нема да пипам во овие средновековни работи затоа што треба да се договорат историчарите што сакаат. Ама кога се работи за Втората светска војна тогаш нема да мрднете од тоа што имаат направено Бугарите во времето на Втората светска војна – дециден е професорот Фридман.
Извор: МИА
