Градоначалниците на Чаир и Тетово ги добиле прекршочните платни налози, но нема информации колку глоба треба да платат за неистакнување на македонското знаме при посетата на косовскиот премиер. Висар Ганиу ја примил и потпишал казната, а за Сител вели дека не знае колку треба да плати, бидејќи судот ја одредувал висината на паричната казна.
„Судот ќе одреди колку ќе биде казната. Не знам колкава ќе биде“, вели Ганиу за Сител
Од судот за прекршоци во Скопје пак велат дека засега немаат предмет со парична казна која треба да ја плати градоначалникот на Чаир. Појаснуваат дека судот ќе постапи само ако во рок од осум дена, не биде платен прекршочниот налог издаден од МВР.
Според информации на Сител, и градоначалникот на Тетово ја добил паричната казна, ама одбил да ја потпише. Касами не одговори дали ќе го плати налогот за прекршок од законот за употреба на македонското знаме. Неговото име го нема ниту во прекршочниот оддел на тетовскот суд.
„По извршените проверки од страна на Архива на прекршочен оддел при Основен суд Тетово, нема поднесена прекршочна пријава против градоначалникот на општина Тетово, Билал Касами, за неистакнување на македонското знаме при посетата на премиерот на Република Косово“, велат од Основен суд – Тетово.
Во меѓувреме од МВР велат дека се трага по лицето кое го вееше знамето на Голема Албанија. Не исклучуваат дека може да е и странски државјанин, а за да биде казнет, да се бара и негова екстрадиција.
Ганиу и Касами како домаќини на косовскиот премиер заработија прекршочни пријави бидејќи ниту во Чаир, ниту во Тетово не беше истакнато македонското знаме, за што се предвидени парични казни од 20 до 50 илјади денари.
