Изградбата на Белата палата, односно Талир 2, Кинеските автопати односно Траекторија, уривањето на комплексот Космос на Фиат Цаноски, односно ТНТ и Титаник за изборни измами се случаите од кои ќе куртули поранешниот премиер Никола Груевски.
Во овие случаи, тој е обвинет за злоупотреба на службената положба, но сè уште нема правосилни пресуди.
Собранието вчера ги изгласа измените на Кривичниот законик со кои се ублажуваат казните за злоупотреба на службената положба и за злосторничко здружување. По стапувањето во сила, овие дела побрзо застаруваат.
Според досегашниот закон, за овие дела беше предвидена затворска казна од 5 до 20 години, па делата апсолутно застаруваа за 40 години. Со измените, казните за злоупотреба на службената положба се намалуваат до максимум 5 години затвор, па апсолутна застареност настапува за 10 години од извршување на делото. Ако има законски измени, за обвинетите се применуваат оние измени кои се поповолни за нив. Со тоа сите злоупотреби на службената должност пред 2013 година, за кои нема пресуди, се застарени.
Затворските казни над една година, застаруваат за три години по правосилноста, па така Груевски нема да лежи 2 години затвор за набавката на владиниот Мерцедес.
Пресудата од 1,5 години затвор за Насилството во Општина Центар застарува догодина, со оглед на тоа што стана правосилна во 2021.
Единствена казна што му „виси“, ако одлучи да се врати во земјата е правосилната пресуда од 9 години затвор за купувањето на Плацевите на Водно. Сепак, минатиот месец Врховниот суд соопшти дека по барање на адвокатот на Груевски оформил предмет за вонредно преиспитување на правосилната пресуда.
Обвинителството соопшти дека за Организација на насилствата во Собранието од 27 април Груевски ќе биде обвинет кога ќе биде уапсен. За останатите обвинети, Апелација го врати предметот на повторно судење.
Од случаите на СЈО, тој треба да се соочи со обвинение во случајот Талир 1 за незаконско финансирање на партијата. Делото злоупотреба на службената положба ќе му застари, но таму е обвинет и за перење пари.
Срѓан Стојанчов Telma
