По повод празникот „8 Септември“, Општинската организација на СДСМ од Кисела Вода, организираше традиционален пикник на „Пеленица“ на кој учество требаше да земат голем број естрадни музички ѕвезди.
Меѓутоа пејачите Јордан Митев и Андријана Ацевска го откажаа настапот бидеќи, тие не биле информирани дека овој настан е организиран од политичка партија, па на своите официјални Фејсбук профили, двајцата јавно се откажаа од настапите во организација на СДСМ – Кисела Вода.
Но затоа Гавазова, Благоја Грујовски и Сања Цинцева одлучија да не откажуваат без разлика на политичката партија, при што се најдоа на мета од нашинците во дијаспората.
Македонците од Австралија јавно кажаа дека овие естрадни уметници ќе бидат бојкотирани и не се пожелни во Австралија- но на многубројните критики одговори и Македонската Барби….
Почитувани граѓани, мои драги обожаватели
Со оглед на последните случувања и оркестрираните напади врз мене како личност и како уметник, чувствувам потреба да ви се обратам.
Познато е дека музиката не познава граници, а не би требало да познава ниту политичка, ниту верска, ниту национална припадност. Музиката е создадена да обединува, да облагородува, да гради мостови! Музиката е јазик кој секој го разбира!
8 Септември е празник на сите граѓани! На него се радуваат сите кои копнееле за независна, слободна држава, без разлика на која партија и припаѓаат!
Оттука, мојата професионалност ми наложува да одговорам позитивно на укажана чест да пеам токму на овој голем празник!
Како уметник, но и како личност никогаш не сум ги делела луѓето по партиска припадност, ниту по било која друга основа.
Јас сум уметник кој познава само љубители на македонската музика, на моите песни и сум силен противник музиката, песните, да им “припаѓаат” на било која партија! Песната им припаѓа на граѓаните!
Но, мора да кажам и дека нема поголемо задоволство за еден пеач, да пее пред публика која го сака и прифаќа. Нема поголемо богатство од таа радост.
За жал поради мојата професионалност, сум мета на напади, клевети и омраза!
Пред тие напади, ќе молчам, зошто таквите коментари и повици полни омраза, зборуваат за тие кои ги пишуваат и кажуваат!
Јас точно знам која сум! Јас сум естраден уметник кој бескрајно ја сака Македонија, земјата во која сум се родила, растела и во која творам!
И токму затоа, ова мое обраќање ќе го завршам со зборовите на големите Блага и Ефто кои треба сите да не потсетат дека “Песната е да се слуша, срце да ти опива, песната е да те гушне, рани да ти измива! Песната е да те роди, да те умре пустата!”
Ви благодарам!
