Државниот санитарен и здравствен инспекторат (ДСЗИ) не констатираше пропусти при вонредниот инспекциски надзор во Болницата во Прилеп, кај матичниот гинеколог на родилката и на Клиниката за детски болести во Скопје за случајот со новороденчето кое почина од сепса. Во трите здравствени установи, медицинската документација и за родилката и за бебето е уредно водена, велат од ДСЗИ, а контролите се спроведени во присуство на сите здравствени работниците.
„При вонредните инспекциски надзори не се констатирани недостатоци кои се во надлежност на Државниот санитарен и здравствен инспекторат. Со оглед на фактот дека ДСЗИ нема надлежности во стручниот дел на работата на здравствените работници, доставена е информација до Министерот за здравство со иницијатива за вршење на стручен надзор“, се наведува во извештајот на ДСЗИ.
Во извештајот во детали се опишува хронологијата на настаните од раѓањето на бебето на 27 октомври во болницата во Прилеп, до неговата смрт на 5 октомри на Клиниката во Скопје. Се наведува дека мајката е породена по природен пат, затоа што немало индикации за царски рез. Родила здраво машко дете кое добило високи оценки за здравствената состојба, која се влошила на 30 ноември. Тогаш бебето со возило на итната помош е префрлено на Детската клиника во Скопје.
„Надзорот не констатирал забелешки ниту во документацијата која се однесува на превентивни мерки за спречување на интрахоспитални бактерии во прилепската болница. На Клиниката во Скопје бебето е донесено во исклучително тешка состојба. Изолирана е бактеријата ешерихија коли во дишните патишта и ставено е на антибиотска терапија, но хемокултурите биле негативни. На 5 ноември во вечерните часови поради влошена сосотјба, бебето било реанимирано. Но, вториот обид за оживување бил безуспешен, по што е констатирана смрт“, се наведува во извештајот на ДСЗИ.
Родителите на новороденчето обвинија за лекарска негрижа во Болницата во Прилеп и категорично ја отфрлија можноста дека инфекцијата кај бебето е пренесена од мајката, затоа што таа имала уредна бременост, што констатира и ДСЗИ при вонррдниот надзор кај матичниот лекат на родилката.
Прилепското јавно обвинителство отвори предмет за случајот, по пријава на родителите на новороденчето, кое почина десет дена по раѓањето.
Емилија Мисирлиевски
