Со 55 гласови „За “ од вкупно 61 пратеник присутен во собраниската сала на 07 февруари е изгласан законот за игри на среќа и за забавните игри предложен од македонската Влада со европско знаменце.
Ниту еден пратеник не гласаше против донесувањето на овој закон, само пратеникот од СДСМ Коле Чаракчиев гласал воздржано, покажуваат бројките од собраниските служби. Опозициската ВМРО-ДПМНЕ пред почетокот на денешната седница бараше овој предлог закон да биде тргнат од дневен ред, но нивното барање не помина. Но, нивните пратеници не гласаа против.
Членови на Асоцијацијата на спортски обложувалници на Македонија (АСОМ) и Асоцијацијата на приредувачи на игри на среќа (АПИС) на протест пред законодавниот дом повторно го изразија својот револт од усвојувањето на законот. Тие бараа од македонскиот претседател Стево Пендаровски да не го потпишува указот за стапување во сила на законот, затоа што, како што велат, со него ќе се затвори гранка во која има илјадници вработени, а кои со овој закон би останале без работа.
Со овој закон се предвидува објектите за игри на среќа да бидат оддалечени не помалку од 500 метри од основните и средните училишта, со цел, како што се вели во законот, заштита на младата популација од лоши и несоодветни навики за нивната возраст.
„Начинот на мерење на оддалеченоста ќе се утврди со правилник пропишан од министерот за финансии, а ќе се воведе и надзорен информациски систем за приредувачите на електронските и интернет игри на среќа, како и ќе се зголеми месечниот надоместок за лотариските и електронските игри на среќа“, пишува во законот кој што денеска беше изгласан.
Законот им овозможува рок од една година на обложувалниците и автомат клубовите да ги преселат деловните простории на најмалку 500 метри од училиштата.
Slobodna Evropa
