Секој граѓанин кој ќе биде оневозможен да ја ползува слободата на движење ќе има право да поднесе тужба и да бара надомест на штета, вели професорот по уставно право, Денис Прешова. Државата сигурно има барем организациска одговорност, смета Маргарита Цаца Николовска, поранешна судијка во Судот во Стразбур
Со личен пример ќе покажам дека граѓанин може да ја тужи државата ако не по своја вина остане без патна исправа по 12 февруари, вели соговорник на Радио Слободна Европа од правната фела, четири дена пред истекот на рокот во кој граѓаните треба(ше) да добијат лични документи со името Република Северна Македонија, според Преспанскиот договор со Грција потпишан во 2018 година.
„Прв услов за тужба е да сте претрпеле некоја штета. Има луѓе со платени аранжмани за скијање зимава, има луѓе со ургентни потреби, одат на прегледи во странство или купуваат лекови од странство. Сите оние кои по 12 февруари ќе се соочат со непријатна ситуација на граница и можат да докажат дека државата поради својата неажурност им оневозможила да остварат некое право, можат да тужат во граѓански суд и да бараат надомест на штета“, вели соговорникот кој сакаше да остане анонимен.
