Автопатот Кичево – Охрид станува историски, како Радин Мост во Кратово.
Според легендата, го ѕидале девет браќа. Дење го граделе, ноќе паѓал. За да го прекинат проклетството, во темелите ја заѕидале најмладата снаа Рада, по која го добил името.
На автопатот ќе решат едни свлечишта, се појавуваат други. Само што не се работи за проклетство, туку, како што оценија експертите, за погрешно избрана траса.
Владата повторно го продолжи рокот за завршување на автопатот за уште три години, до крајот на 2026 година, откако беше пробиен крајниот рок со досегашните анекси – 31.12.2023. Не се предвидени дополнителни пари за изградба, цената останува 598 милиони евра.
„Продолжувањето на рокот е неопходно поради појавата на новите 13 свлечишта што се појавија на трасата, а како резултат на несоодветното проектирање и прераното започнување на изградба без да се земат предвид реалните состојби на теренот кои требало да се третираат во првичната проектна документација“, велат во Министерството за транспорт и врски.
Делници од патот во рамничарскиот дел на трасата ќе бидат пуштени порано бидејќи се скоро готови и нема ризик од свлечишта по нив. За делот од Кичево до тунелите кај Пресека ќе треба повеќе време, а од после тунелите кон Охрид треба да биде пуштен во употреба веќе наредната година летото, освен делот од Песочани до Требеништа кој треба да се гради до октомври 2026.
Тв Телма
