Социјалдемократите од наредната недела ги почнуваат подготовките за свикување на отчетниот Конгрес на кој ќе се реферира за изборните резултати и реструктуирање на партијата по катастрофалниот пораз на партијата на двојните избори.
Од СДСМ брифираат дека највисокото раководство и Извршниот одбор на отчениот Конгрес ќе ги рагледаат причините за изборниот резултат и ќе ги дефинираат роковите кога да се одржат внатрепартиските избори што ги најави лидерот Димитар Ковачевски вечерта по изборниот пораз.
-Процесот на обнова ќе биде на сите нивоа, ќе се избира претседател, заменик претседател, раководство, сите органи и тела на партијата на централно и локално ниво, согласно Статутот на СДСМ, брифираат од СДСМ.
Дел од политичките аналитичари сметаат дека сега за СДСМ поважно е да има коренити реформи и внатрепартиските избори со искрен пристап, отколку тајмингот кога тоа ќе се случи, без да се избрзани, ниту само козметички нашминкани.
– Што е поголем поразот на парламентраните избори, а овој беше историски за СДСМ, потребни се коренити реформи за да фатат приклучок со потребите на електоратот и со вистинските потреби и комуникација со граѓаните… Доколку ги третираме оставките како потег за политички маркетинг, тогаш се задоцнети. Тие требаше да следат веднаш по најголемиот пораз. Но политички одлуки не се носат ниту во еуфорија, ниту во депресија. Поважно од тоа кога ги дале оставките и кој е терминот за нивните реформи е тие реформи да бидат искрени и чесни. Значи навистина да погледнат што е проблемот со намаллувањето на гласачкото тело на таа партија, зошто тоа им се случува, да премина од „denial“ фаза во некаква фаза на прифаќање, изјави Арсовски.
По историски најлошите изборни резултати, дел од високите партиски функционери јавно најавија оставки, но од партијата пoтврдија дека официјално ниту еден не ја депонирал досега. Сепак, објаснуваат дека со самата најава дека ќе се избира ново раководство, всушност целото актуелно е во оставка.
