Законот за изменување и дополнување на Законот за заштита и благосостојба на животните, уште пред пет месеци влезе во собраниска процедура. Требаше да се носи по скратена постапка, но досега тоа не се случи. Со него, меѓу другото, за првпат се предвидуваат гробишта за миленици.
Никој во државата досега не го реши проблемот со кој се соочуваат илјадници граѓани што чуваат домашни миленици, што да прават, каде што да го однесат и закопаат миленикот откако ќе почине. Проблемот е веројатно најголем во Скопје каде што има и најмногу жители, тргнувајќи од фактот дека речиси секое трето семејство чува куче или маче.
Двајца градоначалници во своите предизборни програми, Петре Шилегов и Данела Арсовска ветуваа дека ќе обезбедат простор за т.н. гробишта за миленици, но во мандатот на Шилегов тоа не се случи, а актуелната градоначалничка ветувањето не го спомнува повеќе, дури не ни одговара дали воопшто размислува за такво нешто.
Па, така, во недостиг на соодветен простор, како што има во повеќе европски и земји од регионот, скопјани се принудени своите умрени миленици да ги закопуваат по дворови, на Водно, на кејот и на други законски недозволени места.
Слободен Печат.
