Повеќе од 120 волонтери, пожарникари од Охрид и Ресен, доброволното противпожарно друштво од Свети Николе, центарот за управување со кризи, планинско спасителната служба, како и месно население, го гаснат пожарот на Националниот парк Галичица, кој беснее 11 дена.
Поради силината на ветерот и непристапниот терен, справувањето со пожарот оди тешко, а огнените јазици се гледаат дури од Охрид. Гаснењето го отежнува и присуството на неексплодирани средства, кои на Галичица се останати од времето на Балканските војни и Првата светска војна, поради ова до сега се слушнати и десеттина експлозии. Во гаснењето денес се вклучија авиони и три ер-канадери. Лица кои учествуваат во гаснење велат дека нема место каде што не гори, и оти речиси цела планина е изгорена.
Туристи кои биле сместени во автокампот Љубаништа, биле принудени да си заминат поради густината на чадот. Пожарот е активен од 5-ти август и почнал од територија на Албанија.
Автор: Мики Трајковски Глас на Америка.
