Поранешната министерка за одбрана Радмила Шеќеринска е кандидатка за заменик-генерална секретарка на НАТО, објави „Политико“.
Реномираниот медиум од свои извори дознава дека постои согласност помеѓу сојузниците дека источноевропеец треба да биде назначен за заменик на новиот шеф на Алијансата, Марк Руте.
Покрај Шекеринска, кандидатка за оваа позиција е и поранешната вицепремиерка и еврокомесарка од Бугарија, Марија Габриел. Иако од „Политико“ се обиделе да стапат во контакт и со Шеќеринска и со Габриел сепак не добиле повратна информација од било кој од двете кандидатки.
Ако биде избрана, Шекеринска ќе биде највисокиот функционер на НАТО досега од регионот на Западен Балкан и од земја што не е членка на Европската Унија.
