Според рефератот на судијата известител, кој ќе биде разгледан од уставните судии в среда, не се предлага поведување постапка за оценување на уставноста на Законот за употреба на јазиците. Напротив, во рефератот, до кој „360 степени“ доби увид, се аргументира дека законот има своја уставна основа и е втемелен во амандманот V од Уставот на Република Северна Македонија.
Иако целината на законот не е предмет на сомневање, во рефератот се предлага поведување постапка за оценување на уставноста на неколку општи формулации и две конкретни одредби: симболите на парите и водењето на судските постапки. Овие одредби беа истакнати и во мислењето на Венецијанската комисија од 2019 година како потенцијално проблематични.
Рефератот наведува дека „содржината на оспорениот Закон за употреба на јазиците ја има својата уставна основа“ и дека нема основа за поведување постапка за негово суспендирање или носење времена мерка која би го запрела спроведувањето на законот.
Уставниот суд, пак, во официјален став, вели „во однос на медиумскиот интерес за објавени делови, наводно од реферат од Законот за употребата на јазиците, Уставниот суд информира дека поради тајноста на постапувањето по предметот кој е во претходна постапка, нема да ги коментира медиумските објави ниту нивната веродостојност. Уставниот суд апелира на воздржаност од ширење на информации кои може да наштетат на самата постапката особено во период пред Судот да расправа и да одлучува по предметот“.
