▪️Алијанса за Албанците бара промена на имињата на улиците во Струга
Маркс Енгелс, ЈНА, 8-ми септември, и други, би можеле да заминат во историјата, доколу струшките советници донесат одлука за промена на имињата на улиците во Струга, кои се уште носат називи од времето на комунизмот и поранешна Југославија. Иницијативата за промена на имињата, која дојде од советникот на Алијанса на Албанците, Асим Саитоски, помина во струшкиот совет со гласовите од албанските блок партии, но не и од ВМРО ДПМНЕ и СДСМ. Саитоски вели дека новите имиња, треба да го отсликуваат мултиетничкиот карактер на Струга. Очекува подршка од коалиционите партнери меѓу кои и ВМРО.
„Водени од фактот што нашата општина е мултиетничка,а голем дел од улиците датираат од некои лоши времиња, сметаме дека задираат во чувствата на граѓаните на општина Струга. Допрва треба да разговараме со нашите коалициони партнери и мислиме дека ќе добиеме поддршка,затоа што немаме намера некој да биде отфрлен или некој да се осеќа навреден“, вели Саитоски.
„Иницијативата се поднесува во изборна година и освен ситно политичко профитерство нема никаква друга ефективна вредност која би им го подобрила животот на стружани. Ваквите прашања, доколку имаат за цел да ги унапредат меѓуетничките релации, треба да бидат јавно и стручно елаборирани и дискутирани, на сите нивоа на заедницата“, велат од ВМРО ДПМНЕ-Струга.
Со иницијативата се предлага именување и на улици, кои се уште не се именувани. Од Беса велат дека новите имиња треба да го отсликаат новото време.
„Треба да се отвори поширока дебата, помеѓу сите политички партии да бидеме сите тука инкорпорирани, за да најдеме решение кое ќе ја отсликува новата реалност за нашиот град“, вели Фатмир Емуш, советник од БЕСА.
Од ДУИ сметаат дека именувањето на улиците треба да се направи со грижа и почит кон културното и историското наследство на Струга, Советничката група на СДСМ е против било какво менување на имињата на улиците во Струга.
Иницијативи за промена на имињата на улиците имаше и во минатото, но обидите беа безуспешни, поради неуспешноста на политичките партии да се усогласат, но и бидејќи имаше идеи на вметнување на контрадикторни личности од историјата.
Сега се очекува на некоја од наредните седници на градскиот совет, точката за преименување на струшките улици, да биде поставена на дневен ред и за истата да се гласа по принципот на Бадентерово мнозинство.
Мики Трајковски – ALSAT
