Предлогот на ССМ за зголемување на минималната плата е неприфатлив за работодавачите. Откако вчера синдикатите побараа покрај законското усогласување од околу 2 илјади денари, со што минималецот ќе стане 24 илјади, да има зголемување за дополнителни 6 илјади денари за кои придонесите ќе ги плати државата во период од една година, од организацијата на работодавачи денеска велат дека таквото зголемување би било неоправдано.
„Лесно е да се каже 30 илјади денари, ама во однос на сегашната минималната плата е над 40%. Со што ние зголемивме 40% продуктивност во Македонија, па да ја качуваме минималната плата 40%? Кое е оправдувањето да нашата минималната плата изнесува 72% во однос на просечната плата што го нема никаде во Европа. Сето ова се желби од страна на синдикатите кои успеаја да ги наметнат во јавноста во последниот период“ – Ангел Димитров, Организација на работодавачи
ВМРО-ДПМНЕ, пак, го обвинија првиот човек на ССМ, Трендафилов, дека глуми синдикалец.
„Слободан Трендафилов како синдикалец одмолче кога Талат Џафери пцуеше вработени во собранието, не реагираше на сексуалните напади врз припаднички на армијата од страна на старешини, премолче систематско деградирање на работникот во време на СДС, за сега наеднаш како на тастер да се буди од зимски сон. Слободан Трендафилов нема автентично делување, тој го пресликува СДС“ – Бране Петрушевски, Пратеник на ВМРО-ДПМНЕ
Трендафилов се огласи на социјалните мрежи.
„За едните бев портпарол на ВМРО, за другите сум портпарол на СДСМ, и нивната перцепција секогаш зависи од позицијата во која се наоѓаат, односно дали се на власт или се во опозиција. ССМ работи за работниците, а ВМРО и СДСМ можат слободно да се обвинуваат меѓусебно, имајќи во предвид дека и едните и другите кога беа на власт беа и се против работниците“ – Слободан Трендафилов
Од СДСМ и денеска ја повикаа власта да го прифати нивниот предлог закон за зголемување на платите од 3 до 15 илјади денари, без да се плаќаат придонеси за зголемениот дел. Опфатени би биле 400 илјади работници чии плати не надминуваат 65 илјади денари.
„Придонесите за пензиско, здравствено и социјално осигурување ќе бидат замрзнати на просекот од последните три исплати и тоа во траење од една година. Ова значи сигурност и предвидливост за компаниите, но и повисоки приходи за работниците. Иако за зголемениот износ на платата нема да се плаќаат придонеси, државата и понатаму ќе наплатува 10% данок на личен доход, што ќе донесе 58,5 милиони евра во буџетот“ – Богданка Кузеска, Портпаролка на СДСМ
Минималната плата се утврдува секоја година во март, согласно порастот на трошоците за живот и просечната плата.
Тв Сител.
