Осомничените за незаконската набавка на канерогениот мазут веројатно ќе одговараат и за екоцид. Истрагата која е активна само еден ден, допрва ќе покаже дали ќе се проширува со други кривични дела или ќе опфати уште осомничени лица, јавува тв Сител.
Од обвинителството велат дека истрагата е во тек и не е исклучено доколку дојдат до такви докази, осомничените да бидат гонети и за кривичното дело екоцид. Извори за Сител велат дека во моментов се работи на вештачења од кои можно е да произлезат докази дека осомничените со мазутот кој го набавувале,сериозно го загрозиле здравјето на граѓаните. Доколку надлежните докажат дека осомничените го труеле народот и ги гонат кривично за екоцид, казната која е предвидена во законот е една од највисоките во КЗ.
„Тој што спротивно на закон, со намера да предизвика штета на животната средина, ќе преземе дејствие или ќе пропушти да преземе дејствие поради кое ќе настане сериозна или широкораспространета или долготрајна штета на животната средина, ќе се казни со казна затвор од најмалку 10 години или со доживотен затвор“
Засега официјално Обвинителството осомничените ги гони за неколку кривични дела како злоупотреби и перење пари при набавка на мазут со сомнителен квалитет за државните електрани.
