Претседателот на Србија Александар Вучиќ денеска при посетата на повредените во пожарот во дискотеката во Кочани, кои се на лекување во Универзитетскиот клинички центар на Србија, рече дека во здравствените установи во државата ќе примат вкупно 29 повредени лица, јави МИА од Белград.
Тој нагласи дека во Србија имаат најдобри болнички услови во Европа.
-Невозможно е да се најдат подобри услуги во Европа. Никаде во Европа нема интензивна нега со подобри услови од овде во Белград. Имав можност да ги посетам луѓето кои беа повредени во страшната трагедија во Кочани, Северна Македонија. Девет од нив лежат овде во Клиничкиот центар. Прво посетив двајца, а потоа заедно посетивме седум. Последното лице што го посетивме е во животна опасност, а другите не се. Степенот на изгореници е од четири проценти – рече тој.
Вучиќ додаде дека кај неколку пациенти најголем проблем претставуваат повредите на респираторниот систем.
-Кај нас ќе дојдат уште 12 пациенти, ги имаме на ВМА, ги имаме во Клиничкиот центар во Ниш. Ќе дојдат уште 12 пациенти и како што сега стојат работите, вкупно 29 пациенти ќе бидат во Србија – рече Вучиќ.
Тој порача дека Србија секогаш ќе стои покрај братскиот македонски народ.
