Вонредните инспекциски контроли кои почнаа мината недела по пожарот во кочанската дискотека со 59 загинати, ќе продолжат со проверка на безбедноста во сите станбени згради во земјава. Ќе ги прават општинските инспектори заедно со инспекторите од сите државни институции надлежни за безбедност. Претседателот на Заедницата на локални самоуправи (ЗЕЛС) и градоначалник на Кисела Вода вели дека во неговата општина ваквите проверки се веќе почнати.
„Во мојата општина 27 станбени згради биле подложени на проверки изминатите неколку дена. Од тие 27 најчесто оние кои се најгласни и кои ги утврдуваат аномалиите на системот е утврдено дека баш во тие згради немаат хидранти. Имаме случаи каде што цревата за хидранти се продаваат, биле украдени. Секој треба да си одговара. Ова не е операција во која главниот збор го има локалната власт или централната власт или Орце индивидуално или кој и да е. Во ова треба, луѓе, да учествуваме сите. Ова зависи и од одговорноста на секој поединец во нашето општество. Не требаше да дозволиме да се случи пожарот во Кочани за да утврдиме дека во зградата каде што живеат 400 станари, триесет години нема хидрант“ вели Ѓорѓиевски и нагласува дека тоа не е одговорност и надлежност на Општината, но мора да постапуваат оти утврдиле дека ниту станарите, ниту управителите на зградите не си ја завршиле обврската.
Ѓорѓиевски јавно побара Инспекторатот за домување посоодветно да си ја врши работата и кажа дека како ЗЕЛС дале препораки општинските инспектори да стапат во контакт со управителите на сите станбени згради кои треба да постапат по забелешките кои ќе бидат утврдени при инспекциските надзори во кои главен збор ќе има Дирекцијата за заштита и спасување која постапува во делот на постоење соодветна хидрантска мрежа, противпожарни апарати и се она што претставува безбедност во зградите.
Ѓорѓиевски смета дека на угостителите треба да им се даде рок од еден месец за отстранување на спорните делови и забелешките од инспекторите направени изминатиов период оти контролите покажале дека најголем проблем генерално во цела држава е урбана опрема за кафулињата каде што се констатирани најмногу неправилности.
